Agdagup iti dua gasut ket limapulo ket maysa a bapor ti China, a pakairamanan ti tallo a research ship, ti namonitor iti West Philippine Sea (WPS) idi Martes, Septiembre 24, segun iti Philippine Navy (PN). Maysa a rekord daytoy a kaadu ti indeploy ti China iti WPS a sakup ti exclusive economic zone (EEZ) ti Filipinas.
Kuna ni Rear Admiral Roy Vincent Trinidad, spokesperson ti PN para iti WPS, a nakairekordda iti 28 a bapor ti China Coast Guard (CCG), 16 a warship ti People’s Liberation Army-Navy (PLA-N), 204 Chinese maritime militia vessels (CMMVs), ken 3 a Chinese research and survey vessels (CRSVs) iti panagmonitorda manipud Septiembre 17 agingga iti Septiembre 23.
Ad-adu daytoy no maidasig iti deployment ti China a 157 iti napalabas a lawas wenno iti Septiembre 10 agingga iti Septiembre 16.
Kinuna ni Rear Admiral Trinidad a mabalin a mainaig daytoy a kellaat a yaadu iti mapaspasamak iti WPS kangrunaan iti Escoda (Sabina) Shoal kalpasan ti ipapanaw ti BRP Teresa Magbanua a bapor ti Philippine Coast Guard (PCG) ken iti ipapanaw ti bagyo.
Ruth Padilla, agngayangay a kas Diputado ti Nueva Vizcaya
Innayonna nga iti napalpalabas, tunggal adda bagyo, bumassit ti bilang dagiti barko ti China iti WPS ngem agsublida met laeng kalpasanna—a kas ti napasamak iti napalabas a lawas, ngem ita, nagbalin a 251 ti nagsubli imbes a 157.
Saan ketdi a nasdaaw ti opisial ta daytoy a bilang, nagtalinaed iti namnamaenda a force projection capability ti South Sea Fleet ti China, ti puersa iti taaw a manmantineren ti Beijing iti sibubukel a South China Sea. Innayonna ketdi nga ilegal ti kaadda dagiti bapor ti China iti EEZ ti Filipinas.”
Innayonna pay nga adda latta ti Armed Forces ti Filipinas iti Escoda wenno Sabina Shoal nupay awanen idiay ti BRP Teresa Magbanua. (Martin Sadongdong/Manila Bulletin// Juan A. Asuncion/Bannawag)
