Namnamaen ti Armed Forces of the Philippines (AFP) a makagatang iti mid-range missile systems a kas paset ti modernisasion daytoy, ngem kinuna ni Chief of Staff ti AFP General Romeo Brawner Jr. a maipangpangruna ketdi ti pannakanayon ti bilang dagiti bapor ken fighter jet tapno mapapigsa ti panagpatruliada iti West Philippine Sea (WPS).
Impaganetget daytoy ni General Brawner iti idadar-ayna iti 2024 Asian Defense and Security (ADAS) Exhibition iti World Trade Center iti Pasay City itay Septiembre 25.
Inlawlawag ni Brawner a maipangruna dagiti dadakkel a proyekto ti Philippine Navy (PN) ken Philippine Air Force (PAF), agraman ti pannakapasayaat iti cyber security capability ti AFP.
Kinuna ni Brawner a kasapulan ti pagilian ti Typhon mid-range missile system ti Estados Unidos a nausar idi naangay ti joint military exercises iti Amianan a Luzon idi Abril. (Martin Sadongdong/Manila Bulletin//Lito Hilidon/Bannawag)
