Inikkan dagiti kameng ti Kamara iti maudi a gundaway ni Bise Presidente Sara Duterte ken dagiti kameng ti Office of the Vice President (OVP) a mangikalintegan iti plenario ti singasingda a badiet para iti Tawen 2025 nga aggatad iti PhP2.037 a bilion.
Gapu ta saan a dimmar-ay ni BP Duterte iti Kamara itay Septiembre 24, 2024, immosion ni Deputy Minority Leader Paul Daza, diputado ti 1st District ti Northern Samar, a mairaman ti badiet ti OVP kadagiti tratarenda ita, Septiembre 25.
Sinegundaran met daytoy ni Deputy Majority Leader Jude Acidre ti Tingog Party-list a maysa kadagiti diputado a mangbabbabalaw ken ni BP Duterte iti di panangikankano daytoy iti Kamara.
Gapu ta awan ti nangsupiat, naanamongan ti pannakatratar ti badiet ti OVP ita nga aldaw (Septiembre 25).
Ruth Padilla, agngayangay a kas Diputado ti Nueva Vizcaya
Sakbay daytoy, naawat ti Kamara ti sertipikasion ti House Bill (HB) No.10800 (2025 General Appropriations Bill) a kas "urgent" manipud iti Presidente. (Ellson Quismorio/Manila Bulletin//Lito Hilidon/Bannawag)
