Inakusaran ti National Security Council (NSC) ti China a naglabsing iti pagannurotan ti natalged a panagpatayab iti eroplano ken helikopter (safety aviation rules) iti panangipus ti maysa a military chopper-da iti eroplano ti Bureau of Fisheries and Aquatic Resources (BFAR) nga agpatpatrulia iti Bajo de Masinloc (Scarborough wenno Panatag Shoal) iti West Philippine Sea (WPS).
Impakaammo ni NSC spokesperson Asst. Director General Jonathan Malaya daytoy a pasamak a pakainaigan ti eroplano ti BFAR nga RP-1077 a Cessna C208B Grand Caravan EX, ken ti helikopter ti People’s Liberation Army–Navy (PLA-N) nga addaan iti numero a “65”.
Segun ken ni Malaya, agpatpatrulia ti eroplano ti BFAR iti sakup ti Bajo de Masinloc idi Septiembre 23 idi pagammuan la ta ipusen ti helicopter ti PLA-N. Inradio ti eroplano a mantineren ti helikopter ti natalged a distansia ta delikado ti kinaasidegna, ngem ad-adda nga immasideg daytoy.
Kinuna ni Malaya a di sinungbatan ti helikopter ti PLA-N ti raid call ti eroplano ti BFAR.
'Due process,' naipakat iti pannakaibalud ni Lopez
Inulit ti eroplano ti BFAR ti nagpatrulia iti dayta met la nga aldaw ket sinurot manen ti isu met laeng a helikopter, a nupay medio ad-adayo ken nangatngaton, kaskasdi a naglabsing iti pagannurotan iti kinatalged ti Federal Aviation Administration, innayon ni Malaya. (Martin Sadongdong/Manila Bulletin// Juan A. Asuncion/Bannawag)
