Kalpasan ti panangimatonna iti naballigi nga operasion ti pannakatiliw ni Apollo Quiboloy iti Davao City, nadutokan ni Police Brig. Gen. Nicolas Torre III a baro hepe ti Criminal Investigation and Detection Group (CIDG), iti pannakabalasa manen ti Philippine National Police (PNP), kas imbilin ni hepe ti PNP Gen. Rommel Francisco Marbil ita, Septiembre 25, 2024.
Sinuktan ni Gen. Torre ni Police Maj. Gen. Leo Francisco a nayakar iti Personnel Holding and Accounting Unit iti Camp Crame. Iti sabali a bangir, nadutokan ni Police Brig. Gen. Leon Victor Rosete a suno ni Torre kas Direktor ti Police Regional Office 11 (PRO-11).
Ti CIDG ti kangrunaan nga investigating unit ti PNP .
Idi napan a tawen, naglusulos ni Torre a kas Direktor ti Quezon City Police District gapu iti eskandalo mainaig iti riri iti kalsada a nagwaras iti social media. Naikkan iti sabali a gundaway idi nadutokan a kas Direktor ti PRO-11.
Ruth Padilla, agngayangay a kas Diputado ti Nueva Vizcaya
Iti panagtakemna kas Direktor ti PRO-11, napagpungtotna ni Davao City Mayor Sebastian Duterte gapu iti panangikkatna iti puesto kadagiti nangangato nga opisial ti polisia iti Siudad ti Davao gapu iti mapapati a panangbibiang dagitoy kadagiti datos ti polisia tapno agparang a nasayaat ti imahe ti siudad.
Ti CIDG ti pinusgan ni Gen. Marbil a mangsapul ken ni Harry Roque, ti dati a pannakangiwat ti dati a presidente, nga aglemlemmeng gapu iti pannakainaigna iti pannakaimbestigar dagiti POGO. (Aaron Recuenco/Manila Bulletin//Lito Hilidon/Bannawag)
