Inarestar dagiti ahente ti Philippine National Police Anti-Cybercrime Group (PNP-ACG) idi kalman, Sept. 24, ti maysa nga agtawen iti 20 a babai gapu iti pananggandat daytoy a mangilako iti social media iti kaippasngay nga anakna iti PhP40,000.
Segun iti ina, saanna a kabaelan a padakkelen ti anakna isu nga ilakona laengen. Kinunana nga awan trabahona ken saannan a makontak pay ti ama ti ubing.
Kinuna ni PNP-ACG Spokesperson Lt. Wallen Mae DS Arancillo a naarestar ti babai babaen ti naipakat nga entrapment operation iti Caloocan City.
Segun ken ni Arancillo, naduktalan ti maysa kadagiti cyberpatrol agent-da ti maysa a paskil iti Facebook no adda interesado a gumatang iti maladaga. "Immensahe dagiti cybercop-mi ti tao a nagpaskil ket immanamong daytoy nga ilakona ti mismo a tagibina iti PhP40,000," kinuna ni Arancillo.
Australiano, 2 pay, natiliw gapu iti bogus a doliar
Nakitulag ti suspect nga agsarakda iti polis a kimmontak kenkuana iti maysa a lying-in clinic iti Caloocan City, ket sadiay a naarestar ti suspect ken naisalakan ti anak daytoy.
Naammuan dagiti polis a kayan-anak laeng ti suspect ti maladaga idi Lunes, Sept. 23.
Kinuna ti suspect a kasapulanna ti kuarta nga igatangna iti agas a para maintenance ti tatangna.
Segun iti polisia, makasuan ti ina iti panaglabsing iti Special Protection of Children Against Child Abuse, Exploitation, and Discrimination Act kas mainaig iti Cybercrime Prevention Act of 2012. (Aaron Recuenco/TEMPO)
