SANTIAGO CITY, Isabela— Maysa a pawnshop iti Barangay Centro East itoy nga ili ti maipapan a tinakawan ti grupo a Termite Gang iti aganay a P30-million ti pategna nga alahas, gold bar, ken cash idi Lunes, Septiembre 23.
Kinompirmar daytoy ni Police Lt. Col. Saturnino Soriano, spokesperson ti Santiago City Police Office.
Kinuna ni Soriano a natakuatan dagiti empleado ti nasao a panagtakaw idi sumrekda iti trabahoda.
Madama nga im-imbestigaran dagiti pannakabagi ti linteg ti nagserkan ken nagruaran dagiti suspek. Nakakitada iti maysa nga abut iti uneg ti pasdek.
'Due process,' naipakat iti pannakaibalud ni Lopez
“Irebrebiuda met dagiti CCTV dagiti pasdek nga adda iti aglawlaw ti natakawan a pawnshop,” kuna ni Soriano.
Segun iti polisia, mabalin a nagna dagiti suspek iti drainage canal iti asideg ti pasdek ket pattapattaenda nga immabot iti dua wenno tallo nga aldaw a nagkali dagitoy iti tunnel nga agturong iti pawnshop.
Naireport a tapno saan a matakuatan ti aramidda, pininturaan dagiti suspek iti nangisit dagiti kamera sakbay nga inikkatda ti CPU.
Innayon ti polisia a nawaya dagiti mannanakaw a nangipatungpal iti aramidda ta awan security guard iti pawnshop iti oras ti panangserrekda iti pasdek. (Freddie Lazaro/Manila Bulletin// Juan A. Asuncion/Bannawag)
