Indauluan ni Presidente Ferdinand Marcos Jr. (PBBM) ti taripnong dagiti kameng ti Private Sector Advisory Council (PSAC) - Infrastructure and Digital Infrastructure Sector Groups ken dadduma pay a maseknan nga ahensia a naangay iti Malakanyang itay Septiembre 24, 2024.
Sumagmamano kadagiti insingasing ti PSAC ti pannakaipatakder ti retarding basin ken dam kadagiti kritikal a pagay-ayusan ti danum, pannakabukel dagiti ordinansa a mangmandar kadagiti property developer a mangikabilda iti rainwater detention systems, ken ti pannakaipatungpal kadagiti paglintegan a mangikkat kadagiti ania man a mangbangen kadagiti pagay-ayusan ti danum, agraman informal settlement.
Insingasing pay ti PSAC ti pannakaipatungpal ti master plan para iti river basin, agraman ti pannakapalawa ti Manggahan Floodway ken pannakaiwayat ti watershed restoration program iti entero a pagilian, nangruna kadagiti lugar kas iti Marikina.
Anamongan met ti PSAC ti pannakarepaso ti Parañaque Spillway project ken pannakaipatakder dagiti flood diversion tunnel manipud iti Upper Marikina River agingga iti Pacific Ocean. (Argyll Cyrus Geducos/Manila Bulletin//Lito Hilidon/Bannawag)
