Iti biang ni Bise Presidente Sara Duterte, dagiti laeng 32 a milion a Filipino a nangibotos kenkuana ti adda karbenganda a mangpaikkat kenkuana, saan ket a dagiti kunana a “Young Guns” wenno “agatsinuso” a kameng ti Kamara.
Kinuna daytoy ti Duterte itoy nga aldaw, Sept. 25, Mierkoles, kalpasan ti panangisingasing dagiti kunana nga agatsinuso a kameng ti Kamara iti panaglusulosna koman a bise presidente.
“Hindi naman kasi ako sasagot sa Young Guns dahil kailangan ko sumagot sa 32 million na bumoto sa akin, hindi sa isa o dalawa na tao,” kinuna daytoy iti press conference a naangay iti opisinana iti Siudad ti Mandaluyong.
“I will not resign because I was put here by the people believing that I will work for the country,” kinunana iti naglaok a Filipino ken English a panagsaritana.
Ruth Padilla, agngayangay a kas Diputado ti Nueva Vizcaya
Mainaig daytoy a pakaammo ni Duterte iti kinuna ni Ako-Bicol Partylist Rep. Raul Angelo Bongalo, a kasla awanen ti regget ti bise presidente a mangannong kadagiti pagrebbenganna isu a mabalin a makiddaw kenkuana nga aglusulos la koman.
Kinuna met ni House Deputy Speaker ken Quezon 2nd district Rep. David Suarez a daytoy nga imbaga ni Diputado Bongalo, kasta met ti kapanunotan ti “adu a kameng” ti Kamara.
Ngem adda teoria ti Bise Presidente no apay a kidkiddawen dagitoy a kameng ti Kamara ti panaglusulosna.
Kinunana: “So, apparently sa pakiramdam ko sa tingin ko sa mga nangyayari, wala silang kaso for impeachment kaya sila andiyan, kaya sila sige hanap nang hanap ng kung anong gagamitin nila.”
Intudona da ACT Teachers Partylist Rep. France Castro ken dati a senador Antonio Trillanes IV, maysa kadagiti kritiko ti amana, a kas mangidadaulo iti panggep a pannakapatapuakna.
Iti sabali a bangir, kinuna ketdi ti Bise Presidente nga adda dagiti agpampanday-linteg nga iti panagkunada, saannan nga in-intonaran dagiti pagrebbenganna isu a masapul nga aglusulos iti puestona.
Kalpasan ti dina yaatendar iti plenary hearing idi Lunes, Sept. 23 para iti singasing a badiet iti 2025 ti Office of the Vice President(OVP), naikkan ti bise presidente iti gundaway nga agatendar iti hearing iti daytoy nga aldaw, Sept. 25.
Ngem kinuna ni Duterte a ti atendarannanto ket ti Senate budget deliberations.
Pabpabasolen ti Bise Presidente dagiti agpampanday-linteg agraman ti House good government committee, a pagbalbalinenda a riri iti politika ti panagkidkiddawna iti badiet ti opisinana ken pabasolenna pay ida a mangplamplano iti pannakapatapuakna iti poder tapno madadael ti mabalin a panagtarayna a presidente inton 2028. (Raymund Antonio/Manila Bulletin// Cles B. Rambaud/Bannawag)
