Mabalin a ngumina ti gasolina, diesel, ken dadduma pay a produkto ti lana iti umay a lawas, maibatay iti panagkuenta dagiti kompania ti lana.
Maibatay iti kuentada, dakkel ti posibilidad a ngumina manipud iti P0.65 agingga iti P1.05 ti kada litro ti gasolina, manipud iti P0.80 agingga iti P1.20 ti kada litro ti diesel, ken ti gas (kerosene), manipud iti P0.60 agingga iti P1.00 ti kada litro.
No ti kangrunaan a pagibatayan ket ti tallo-nga-aldaw a trading a kas Makita iti Mean of Platts Singapore (MOPS), mapattapatta a P0.667 ti nginaan ti kada litro ti gasolina, P0.813 ti kada litro ti diesel; ken P0.602 ti kada litro ti kerosene.
Kuna ketdi dagiti kompania ti lana a nupay agparparangen nga adda nginaan dagiti produkto ti lana, mabalin nga agbaliw pay ti pinal wenno pudno a nginaanna ta adda pay natda a dua nga aldaw a trading iti internasional a merkado.
Ilocos Sur, Umuna a Puesto iti Regional SubayBAYANI Awards
Mairaman kadagiti rason iti ingingina dagiti produkto ti lana ti ingingina met ti kada bariles a lana manipud iti nababbaba pay ngem $70 iti napalabas a lawas a ngimmato iti $75 ti kada bariles iti nabiit pay a pannakatingiting ti presio daytoy.
Malaksid iti dayta, manamnama pay ti panagkasapulan ti Tsina iti ad-adu pay a lana, ti mabalin a pannakaisardeng ti produksion ti lana gapu iti posible a panangbasnot ni Hurricane Helen (Bagyo Helen) iti Gulf of Mexico a yan dagiti oil-producing platforms, ken ti kumarkaro a riribuk iti nagbaetan ti Israel ken Lebanon a kunada a mabalin pay a makaigapu iti ingingina pay dagiti produkto ti lana kadagiti sumarsaruno pay a lawas. (Myrna M. Velasco/Manila Bulletin// Cles B. Rambaud/Bannawag)
