Indagadag ti Cybercrime Investigation and Coordinating Center (CICC) ita, Septiembre 26, 2024 ti panagridam ti publiko a dida ikankano dagiti awag iti telepono nga agkunkuna a masuspende ti Subscriber Identity Module (SIM) card-da.
Imballaag ti CICC, maysa a sanga nga ahensia ti Department of Information and Communications Technology (DICT), iti publiko a dida ikankano dagiti maawatda nga awag manipud iti tao a dida am-ammo nangruna no kuna daytoy nga empleado ti DICT ken kunana a masuspende ti SIM card (ti inawaganna) gapu kadagiti nadumaduma a panaglabsing.
Segun iti CICC, dagitoy a mapagduaduaan nga awag iti telepono ket mabalin a mangitunda iti ilegal nga aktibidad a kas iti ilegal recruitment kadagiti agtrabaho iti abroad, online gambling, ken human trafficking.
Imbalakad ti CICC iti publiko a no adda kastoy a masalawda, ipulongda a dagus iti numero ti Inter-Agency Response Center 1326. (Merlina Hernando-Malipot/Manila Bulletin//Lito Hilidon/Bannawag)
