Naideklara a saan a natalged iti salun-at ti 70 a baboy a natiliwan iti maysa a checkpoint iti Quezon City kalpasan a nagpositibo dagitoy iti African Swine Fever (ASF) iti pannakaamirisda idi Biernes, Septiembre 27, inwaragawag ti Department of Agriculture (DA).
Kinuna ti DA a natiliwan ti pannakaibiahe dagitoy iti checkpoint iti Mindanao Avenue idi Septiembre 26.
Segun iti ahensia, iti pannakasaed dagiti dingo, addan dagiti pagilasinan nga agsagsagaba dagitoy iti ASF. Pinasingkedan iti laboratory test a positibo dagiti baboy itoy makappatay a sakit.
Inyunay-unay ni DA Assistant Secretary for Swine and Poultry Dr. Constante Palabrica, ti kinapateg ti 24/7 a checkpoint iti pannakalapped ti panagakar-akar ti ASF iti nagbabaetan dagiti rehion.
Ruth Padilla, agngayangay a kas Diputado ti Nueva Vizcaya
Pinalagipanna dagiti lehitimo a negosiante a siguraduenda a balido amin dagiti dokumentoda nga agibiahe.
Malaksid iti baboy, kinuna ti DA nga am-amirisenda met dagiti maibiahe a manok tapno malapdan ti panagwaras ti Highly Pathogenic Avian Influenza (HPAI).
Manipud idi nairugi dagitoy a checkpoint idi Agosto 2024, addan dandani 500 a baboy a naimpektaran iti ASF ti natiliwan ti Bureau of Animal Industry (BAI) ken ti Philippine National Police (PNP) iti entero a pagilian.
No nakalasat koma dagitoy a 500 a naimpektaran a baboy kadagiti checkpoint, makadanonda koma kadagiti kangrunaan a probinsia kas iti Ilokos, Pangasinan, Tarlac, Bulacan, ken Cagayan, a posible a mangpakaro iti panagraira ti ASF ken mangpataud iti nakaro a pangta iti salun-at ti publiko, innayon ti ahensia.
Malaksid kadagitoy, kinuna ti DA a nakakompiskar pay dagiti autoridad kadagiti produkto a karne nga addaan kadagiti peke a Certificate of Meat Inspection (COMI) ken nasukatan a manufacturing date. (Jel Santos/Manila Bulletin//Juan Asuncion/Bannawag)
