Kiniddaw ti National Food Authority (NFA) nga iruaren ti Department of Budget and Management (DBM) ti PhP9 a bilion a pondo a nailatang a paggatang iti irik itoy a tawen.
Kinuna ni Administrator ti NFA Larry Lacson a ti mairuar a pondo ket makatulong a mangpaadu iti lebben ti NFA iti agarup PhP11 a bilion, ket magun-od ti target-da a gatangen manipud 6.4 a milion agingga 8.7 a milion a sako ti irik sakbay nga agleppas daytoy a tawen.
Kuna met ni Secretary ti Department of Agriculture (DA) Francisco Laurel Jr. a masapul a mairuaren ti nasao a pondo tapno matulonganda dagiti mannalon ken mapalaka dagiti presio ita panagaapit a panawen ti tudtudo.
Segun iti DA, nausar ti natda a badiet a PhP8.7 a bilion manipud 2023 a paggatang iti irik kadagiti mannalon ita a tawen. Adda PhP5.3 a bilion a nailatang a pinanggatangda iti 3.5 a milion a sako ti irik iti umuna a paset ti tawen.
PSC, naka-red alert; seguridad ni Marcos, nadoble kalpasan ti pangta ni Duterte
Impanamnama ni Laurel kadagiti mannalon a gatangen ti NFA ti irikda manipud PhP21 agingga PhP23 tunggal kilo. (Jel Santos/Manila Bulletin//Lito Hilidon/Bannawag)
