Indauluan ni President Ferdinand R. Marcos Jr. ita, Septiembre 27, 2024 ti panaglukat ti 3.17-kilometro a Panguil Bay Bridge Project, ti kaatiddogan a rangtay a bumallasiw iti baybay iti Mindanao a proyekto ti Department of Public Works and Highways (DPWH).
Aggatad iti PhP8.026 a bilion ti Panguil Bay Bridge Project a mamagsilpo iti Siudad ti Tangub sadiay Misamis Occidental ken iti ili ti Tubod iti Lanao del Norte. Narugian ti proyekto idi Pebrero 28, 2020.
Gapu itoy, agbalin laengen a 7 a minuto ti biahe manipud Misamis Occidental ken Lanao del Norte, manipud iti sigud a 2-oras a biahe. Manamnama pay a mapasayaat ti transportasion ti tao ken produkto kadagiti adda iti igid ti baybay iti rehion.
Naponduan ti proyekto babaen ti loan agreement a pinirmaan ti gobierno ti Filipinas ken ti Korean Export-Import Bank idi 2016.
Ruth Padilla, agngayangay a kas Diputado ti Nueva Vizcaya
Ti Panguil Bay Bridge Project ti maysa kadagiti kangrunaan a proyekto ti administrasion ni Marcos a "Build, Better, More." (Ruth Abbey Gita-Carlos/PNA//Lito Hilidon/Bannawag)
