Impinget ni Israeli Prime Minister Benjamin Netanyahu idi Huebes, Sept. 26, nga isayangkat ti Israel ti 'naan-anay a puersa" kontra iti grupo a Hezbollah iti Lebanon agingga a di agsardeng ti grupo a mangipabanto kadagiti rocket iti ballasiw ti beddeng (ti Lebanon ken Israel). Gapu i'toy, kimmudrep met ti manamnama a singasing a cease-fire nga indatag dagiti opisial ti U.S. ken Europa.
Nangiwayat ti Israel iti kabarbaro a panangraut iti kabesera ti Lebanon, a nakatayan ti maysa a nangato a komander ti Hezbollah, ket kas balesna, nangipatayab met ti grupo iti pinulpullo a rocket iti Israel. Pinullo a ribun nga Israeli ken Lebanese nga agnanaed iti asideg ti beddeng dagiti pagilianda ti naapektaran gapu iti panagbimbinnales ti Israel ken Hezbollah.
Mapan a 700 a tattaon ti natay iti Lebanon ita a lawas iti agtultuloy a panangbombomba ti Israel, a kunkunana a ti pumpuntiriaenna ket ti Hezbollah. Segun kadagiti lider ti Israel, determinadoda a mangpasardeng iti panangraraut ti Hezbollah iti nagbedngan, a nangrugi kalpasan ti panangraut ti Hamas idi Oktubre 7, 2023 a nangpasged iti gubat iti Gaza.
Segun iti Israeli military, napapatay ti drone commander ti Hezbollah a ni Mohammed Hussein Surour, iti panangbombada iti suburbs ti Beirut. Pinasingkedan ti Hezbollah ti ipapatay ni Surour.
Pannakaiserra ti Departamento ti Edukasion ti U.S., imbilin ni Trump
Kinuna ti Lebanese Health Ministry a dua a tattao ti natay ken 15 ti nasugatan iti nasao a panagbomba. Impakita ti Associated Press dagiti retrato ti napuoran nga apartment iti maysa a residensial a pasdek iti Dahiyeh, a yan a kangrunaan dagiti Shiite ken pagnanaedan ti adu a kameng ti Hezbollah.
Iti naglabas, manmano a puntiria ti Israel dagiti lugar iti Beirut kabayatan ti pannakidangdangadangna iti Hezbollah idi Oktubre 2023. Ngem iti napalabas a lawas, namin-adu a pinuntiria a binomba ti Israel dagiti akin-abagatan a paset ti Beirut.
Binomba ti Israel ti 75 a lugar idi Huebes iti abagatan ken daya a Lebanon. Bimmales met ti Hezbollah ket nangipasayag iti mapan a 175 a projectile iti Israel.
Kinuna ti Israel a posible a mangisayangkat daytoy iti ground invasion iti Lebanon tapno mapapanaw ti Hezbollah, maysa a grupo a Shiite a supsuportaran ti Iran, ket adaywan daytoy ti beddeng. Rinibun a tropa ti Israel ti naipan iti amianan ti Lebanon kas panagsaganada. Agarup 100,000 a Lebanese metten ti pimmanaw kadagiti pagtaenganda iti lugar iti napalabas a lawas, ket nagkamangda iti Beirut ken dadduma pay a luglugar iti amianan.
Nagibiahen ti Israeli military kadagiti tangke ken armored vehicles iti akin-amianan a beddengna iti Lebanon maysa nga aldaw kalpasan ti panangayab dagiti millitary commander kadagiti Israeli a reservist. (Associated Press/MANILA BULLETIN)
