Kuna ti Department of Justice (DOJ) itay Septiembre 27, 2024 a kiddawenna iti Pasig City Regional Trial Court (RTC) ti pannakaisubli ni Alice Guo iti sidong ti Philippine National Police (PNP).
Ni Guo, a naidarum iti di mapiansaan a kaso a qualified trafficking in persons, ket nayakar iti Female Dormitory ti Pasig City Jail kas imbilin ti Pasig City RTC.
Segun ken ni Prosecutor General Officer-in-Charge Senior Deputy State Prosecutor ti DOJ Richard Anthony D. Fadullon, binilinnan dagiti prosecutor a mangig-iggem iti kaso ni Guo a kiddawenda a maisubli koma daytoy iti Custodial Center ti PNP.
Kinuna ni Fadullon a nataltalged iti panagriknana no agtalinaed ni Guo iti sidong ti PNP, saan ket nga iti Bureau of Jail Management and Penology (BJMP), nupay dina met tagtagibassiten daytoy.
PSC, naka-red alert; seguridad ni Marcos, nadoble kalpasan ti pangta ni Duterte
Innayon ni Fadullon a nalaklaka a mayallatiw ni Guo iti Pasig City RTC ken iti dadduma pay a korte a nakaidarumanna.(Jeffrey Damicog/Manila Bulletin/Lito Hilidon/Bannawag)
