Impakaammo ti maysa a nangato nga opisial ti Department of Social Welfare and Development (DSWD) a ti 32 nga ubbing nga adda iti sidong ti Children's Joy Foundation, Inc. (CJFI), a paset ti Kingdom of Jesus Christ (KOJC), addan iti residential care facilities ti DSWD wenno naisublin kadagiti pamiliada.
Iti maysa a media forum, kinuna ni Assistant Secretary for Standards and Capacity Building Group ti DSWD Janet Armas a nagpason ti Certificate of Registration and License to Operate (CRLTO) ti CJFI iti lima a pasilidad daytoy iti Central Luzon (Region 3), Calabarzon (Region 4-A), Central Visayas (Region 7), Davao Region (Region 11), ken iti National Capital Region (NCR).
Adda iti sidong ti DSWD ken Social Welfare and Development Agencies (SWDAs) dagiti 13 nga ubbing, idinto a naisublin kadagiti pamiliada dagiti 14. Dagiti lima a nabati ket adda iti foster care wenno agsagsaganadan nga agbiag nga agwaywayas.
Inlawlawag ni Armas a naiwayat ti pannakatingiting dagiti CJFI centers gapu iti pammilin ti Senado a marepaso amin nga SWDA a paset ti KOJC tapno masalakniban dagiti ubbing, gapu iti kaso a child abuse ken human trafficking kontra ken ni Apollo Quiboloy.
Ruth Padilla, agngayangay a kas Diputado ti Nueva Vizcaya
Natakuatan ti DSWD a saan a natungpal ti CJFI dagiti rekititos tapno mapabaro ti CRLTO-na, ngem impanamnama ni Armas nga awan ti natakuatanda nga ubing a naabuso kadagiti lima a center a nairehistro iti DSWD. (Ellalyn De Vera-Ruiz/Manila Bulletin//Lito Hilidon)
