Maitunos iti linteg ti pannakayakar ni Cassandra Ong manipud iti detention center ti Kamara agturong iti Correctional Institute for Women (CIW) sadiay Mandaluyong City.
Daytoy ti kinuna dagiti mangidadaulo iti Quad-committee ti Kamara a nangibilin ti pannakayakar ni Ong kalpasan ti kapamitlo a pannaka-cite for contempt daytoy gapu iti mapapati a panagulbodna iti maar-aramid a hearing.
Impaganetget da Diputado Ace Barbers (Surigao del Norte 2nd district), Bienvenido “Benny” Abante Jr. (Manila 6th district), Joseph Paduano (Abang Lingkod Party-list), Dan Fernandez (Santa Rosa lone district), ken Romeo Acop (Antipolo City 2nd district) a nainget ti pannakatratarna ken nagdalan iti umno a proseso ti pannakayakar ni Ong.
Manipud pagpupokan ti Kamara sadiay Batasan, Quezon City nayakar ni Ong iti CIW ita Septiembre 25, 2024. (Ellson Quismorio/Manila Bulletin//Lito Hilidon/Bannawag)
