Pinattapatta dagiti aglaklako iti lana a bumaba iti P0.10 ti immuna a pattapatta a nginaan ti presio ti gasolina ket nagbalin a P0.50 iti tunggal litro, ngem dakkel ti ngatuan ti diesel ken gaas (kerosene) ta manipud iti P0.55, agbalin daytoy a P0.95 iti tunggal litro ti diesel idinto a manipud iti P0.25, agbalin met a P0.65 iti tunggal litro ti gaas.
Baliwan dagiti kompania ti lana ti presioda inton Martes (Oktubre 1).
Dakdakkel pay koma dagiti immun-una a pattapatta, ngem gapu ta nagsuek ti presio iti merkado iti lubong iti naudi a dua nga aldaw, addaan daytoy iti spillover effect iti panaggaraw ti presio kadagiti paggasolinaan iti Filipinas.
Segun kadagiti eksperto iti industria, nagsuek ti internasional a presio gapu iti panagamak iti aglablabes a suplay gapu iti damag a panangpasubli ti Saudi Arabia iti puestona iti sangalubongan a merkado ti lana babaen ti panangyad-aduna iti produksionna.
Ruth Padilla, agngayangay a kas Diputado ti Nueva Vizcaya
Impasimudaag dagiti mangbambantay iti merkado ti lana a ti plano ti Saudi Arabia, ti kadakkelan nga oil producer iti sangalubongan, maibilang a panangtallikud daytoy iti immun-una a puntiriana para iti nangatngato ti presiona a lana, a naikeddeng a di umadayo iti $100 iti tunggal bariles. (Myrna M. Velasco/Manila Bulletin//Juan A. Asuncion/Bannawag)
