Iti umuna a gundaway, idi Septiembre 27, saan a nakapagteppel ni Alice Guo iti hearing nga isaysayangkat ti House quadcom gapu iti panangdamagda no maysa isuna nga espia.
Nupay saan a daytoy ti immuna a panangdamagda ken ni Guo no maysa isuna nga espia, madlaw a nasukit ti pungtotna gapu iti panangipabuya dagiti diputado iti hearing iti maysa a dokumentario maipapan ken ni She Zhijiang a maysa a Chinese tycoon.
Sumagmamano a paset ti dokumentario ti naipabuya bayat ti panagsalsaludsod da Dip. Cheeno Miguel Almario ti maikadua a distrito ti Davao Oriental ken Dip. Margarita “Migs” Nograles ti Puwersa ng Bayaning Atleta (PBA) Partylist .
Iti dossier ni She a naipakita iti dokumentario, nailanad ti Guo Hua Ping, nga ibagbagada a Chinese a nagan ni Alice Guo.
Valdez, Opinaldo, Padios, nangabak iti Maika-72 a Palanca Memorial Awards for Literature
Maysa nga excerpt a naipakita iti four-way panel ti apela ni She ken ni Guo.
“Guo Hua Ping. China cannot be trusted. The two of us once dedicated our lives to China's Ministry of State Security. Look at that happened to me. If you don't want to be eliminated, you should tell the world the truth (Guo Hua Ping. Saan a mapagtalkan ti China. Iti naminsan, agpadata a nangidedikar iti biagta iti Ministry of State Security ti China. Kitaem ti napasamak kaniak. No dimo kayat ti maipakni, rumbeng nga ibagam iti lubong ti kinapudno," kinuna ni She.
Idi madamag ken ni Guo no am-ammona ni She Zhijiang, kinunana a saan, ken kayatna koma met a maammuan dagiti detalye ta kayatna met ti agdarum.
Patien ketdi ni Almario nga agsasao iti pudno ni She ta naipasulin ti Ministry of State Security ket “awanen ti mapukawna” pay. (Ellson Quismorio/Manila Bulletin//Juan A. Asuncion/Bannawag)
