Dinutokan ti National Capital Region Police Office (NCRPO) ti agarup 1,400 a polis a kas paset ti panangsinunuo a natalged ti panagipila iti certificates of candidacy para iti midterm election manipud Oktubre 1 agingga 8.
Segun ken ni hepe ti NCRPO Maj. Gen. Jose Melencio Nartatez, Jr., maiwaras dagiti polis iti asideg ti opisina ti Commission on Elections (Comelec) iti Manila ken dadduma pay a lugar a manamnama a pagtitiponan dagiti kandidato ken dagiti mangsupuportar kadakuada.
Kinuna ni Nartatez a binilinnan ti lima a direktor iti Metro Manila tapno masinunuo nga umdas ti tao a mapusgan a mangimaton iti tao ken trapiko, ken mangasistir kadagiti kandidato ken iti publiko.
Pinalagipanna met ti publiko a mangkikooperar iti autoridad ken raemenda dagiti paglintegan nga impaulog ti Comelec bayat ti tiempo ti panagipila. (Aaron Recuenco/Manila Bulletin//Lito Hilidon/Bannawag)
