Inauguraran ni Presidente Ferdinand Marcos Jr. ti StB Giga Factory iti Tarlac, ti kaunaan a planta iti Filipinas nga agaramid iti bateria a lithium-iron-phosphate (LFP) ita nga aldaw, Septiembre 30.
Kuna ti Presidente a daytoy ti mangidalan iti pagilian nga agbalin a maysa kadagiti pagilian iti Southeast Asia nga agparpartuat iti clean energy storage.
Malaksid iti panangitandudo iti nadalus nga enerhia, ipasimudaagna pay ti panagbalin ti pagilian a go-to destination para kadagiti high-tech ken high impact investment, kinuna ni Presidente Marcos.
Innayon ti Presidente a guyugoyen ti paktoria ti ad-adu pay nga agnegnegosio a tumulad ket agusarda met iti naladus nga enerhia iti baet dagiti pangta nga itden ti climate change.
Mangnamnama ni Marcos iti pannakaisubli ti panangipateg ni Pinoy iti arte a Filipino
Kinunana a tunggal addang nga agturong iti sustainable energy development “ket maysa a panagpuonan iti naranraniag ken nasalsalun-at a masakbayan para kadagiti annaktayo, para iti pagiliantayo.”
Dinakamat pay ti Presidente a ti paktoria ket nayon dagiti naikari iti pagilian kabayatan ti Philippine Business Forum idiay Melbourne, Australia idi Marso iti daytoy a tawen. (Betheena Unite /Manila Bulletin//Juan A. Asuncion/Bannawag)
