Kinompirmar ti Bureau of Jail Management and Penology (BJMP) ita, Septiembre 30, a naitantan ti pannakaibasa ti kaso (arraignment) ni dati a Mayor ti Bamban, Tarlac Alice Guo iti Valenzuela City Regional Trial Court (RTC).
Kinuna ni panakangiwat ti BJMP Supt. Jayrex Bustinera nga inyalud-od ti Valenzuela RTC Branch 282 ti arraignment ni Guo inton Oktubre 20 iti kasona a graft nga impila ti Department of the Interior and Local Government (DILG).
Iti arraignment, pormal a maipakaammo iti defendant (Guo) no ania ti kaso kontra kenkuana, maipakaammo kenkuana dagiti karbenganna a kas akusado, masaludsod no akuenna a nagbasol wenno saan, ken maituding ti piansa no awan pay.
Kinuna ni Bustinera a saan nga imbaga ti korte no apay a naitantan ti arraignment ni Guo, ngem bantayanda kano a naimbag ti tignayna, ta adda pay kasona iti Pasig City RTC Branch 167.
Ruth Padilla, agngayangay a kas Diputado ti Nueva Vizcaya
Itay Septiembre 23, nayakar ni Guo manipud iti Custodial Center ti Philippine National Police (PNP) iti Camp Crame naipan iti Pasig City Jail kas imbilin ti Pasig City RTC.
Innayon ni Bustinera a nainget ti seguridad ni Guo, ket awan ti pangta iti biag daytoy gapu ta asideg iti seldana ti estasion ti guardia. (Chito Chavez/Manila Bulletin//Lito Hilidon/Bannawag)
