Iti umuna a gundaway iti dandanin makatawen a panagbimbinnales ti Israel ken ti grupo a Hezbollah iti Lebanon, pinuntiria a binomba dagiti eroplano ti Israel ti sentro ti Beirut ken natamaan ti maysa a residensial a pasdek ita a Lunes, Sept. 30. Paset daytoy ti agtultuloy a panangatakar ti Israel iti nadumaduma a lugar iti Lebanon a nakatayan ti pinullon a tattao ken nakapakaruan a nangdayyeg iti liderato ti Hezbollah, kangrunaan ti pannakapapatay ti daulo daytoy a ni Hassan Nasrallah.
Tinamaan ti airstrike ti maysa a multistory residential building, segun iti maysa a journalist ti Associated Press iti lugar. Naipakita kadagiti bideo dagiti ambulansia ken bunggoy a naguummong iti asideg ti pasdek iti distrito a kaaduanna ti agnanaed a Sunni ken yan ti makumikom a kalsada a napaunoran iti adu a shop.
Kinuna ti maysa a Palestinian leftist faction iti Lebanon a tallo kadagiti kamengna ti napapatay iti airstrike. Kinuna met ti Popular Front for the Liberation of Palestine iti maysa a statement a nairaman a natay dagiti komanderna iti militar ken seguridad.
Maysa nga opisial iti Lebanon’s Civil Defense ti immun-una a nagkuna a maysa a kameng ti al-Jamaa al-Islamiya ti napapatay iti airstrike kasta met a 16 a dadduma pay a tattao ti nasugatan.
Resolusion ti UN nga agkidkiddaw ti ceasefire iti Gaza, saan a pinaboran ti Estados Unidos
Itoy met la a Lunes, maysa pay nga airstrike ti nakatayan ti maysa a komander ti militante a grupo a Hamas, nga addaan iti presensia kadagiti kampo dagiti Palestinian refugee iti Lebanon. Kinuna ti Hamas a natay ni Fatah Sharif ken ti pamiliana iti airstrike iti Al-Buss refugee camp iti siudad ti Tyre.
Iti napalabas a lawas, masansan a pumpuntiriaen ti Israel dagiti akin-abagatan a suburbs ti Beirut, a yan ti adu a kameng ti Hezbollah. Ditoy a napapatay idi Biernes ti liderda a ni Nasrallah. (Associated Press/MANILA BULLETIN)
