Kiniddaw ni Secretario ti Department of National Defense (DND) Gilberto Teodoro Jr. kadagiti mammanday-linteg ita, Septiembre 30, nga amendaranda koma ti Espionage Law ti pagilian tapno maipakat daytoy uray iti panawen ti talna.
Daytoy ni kinuna ni Teodoro kas sungbat kadagiti saludsod mainaig iti maatap a pannakairaman ni dati a Mayor ti Bamban, Tarlac Alice Guo iti panagespia.
Nupay di pay napatalgedan no pudno nga espia ni Guo wenno saan, kinuna ni Teodoro a saan koma a liplipatan dagiti autoridad ti kangrunaan a punto: a nairaman ti mayor kadagiti ilegal nga aramid.
Ti Commonwealth Act No. 616 ti mangdusa iti basol a panagespia ken dadduma pay nga ar-aramid a maisalungasing iti seguridad ti pagilian iti panawen ti gubat. (Martin Sadongdong/Manila Bulletin//Lito Hilidon/Bannawag)
