Saan man a nangabak daytoy agtawen iti 81 a South Korean fashion model a kas Miss Universe Korea, inyawidna met ti pammadayaw a “Best Dresser.”
Naangay ti Miss Universe Korea pageant itay Sept. 30 iti maysa a hotel iti Seoul, kabesera ti South Korea, a nakisalipan ni Choi Soon-hwa kaduana dagiti babbalasang nga arigna appokonan.
Nagbado iti beaded white gown, naparagsit daytoy pumirak ti buokna a senior citizen a nakirampa ken nakisalip pay iti kinnantaan iti Miss Universe Korea pageant.
Maysa a dati a hospital care worker, nangrugi ni Choi a kas modelo idi agtawenen iti a pito a dekada. Sakbay ti Miss Universe Korea pageant, naiwaragawag a napili a kas finalist, kaduana ti 31 a sabsabali pay a contestant.
Ruth Padilla, agngayangay a kas Diputado ti Nueva Vizcaya
No nakisalip koma ni Choi iti Miss Universe Korea pageant a naangay itay napan a tawen, saan koma a kualipikado ta maibatay iti pagalagadan, masapul nga agtawen iti 18 agingga iti 28 dagiti mapalubosan a makisalip.
Daytoy a pannakalimitar ti edad dagiti makisalip ti kinastigo dagiti umili isunga itoy a tawen, naikkat dayta a pagalagadan.
Malaksid iti dayta, inikkat pay dagiti mangimaton iti pageant ti swimsuit competition ken dagiti kualipikasion a mainaig iti nalpas a tukad ti adal, kinatayag, ken kinalaing iti ganggannaet a lengguahe. (Associated Press/Manila Bulletin// Cles B. Rambaud/Bannawag)
