Babaen ti Provincial Resolution No. 341-2024 nga impaulog ti Sangguniang Panlalawigan ti Ilocos Norte, naideklarar ti probinsia nga adda iti State of Calamity gapu iti nakaro nga epekto ni Bagyo Julian.
Inyeg ni Julian ti nasaknap a panaglayus, pannakadadael dagiti rangtay ken kalsada, ken pannakaawan ti koriente ken linia ti komunikasion iti probinsia.
Segun iti Communications and Media Office (CMO) ti Ilocos Norte, nasurok a PhP85 a milion ti mapattapatta a balor ti nadadael a mula, ken PhP385,000 kadagiti taraken a baka ken manok.
Madama ti pannakatingiting ti balor dagiti nadadael nga empraestruktura.
Mangnamnama ni Marcos iti pannakaisubli ti panangipateg ni Pinoy iti arte a Filipino
Indagadag ni Gov. Matthew Marcos Manotoc kadagiti umili ti Ilocos Norte nga agridamda ken surotenda ti balakad ti PAGASA iti mabalin a panagsubli ni Julian iti Filipinas inton Oktubre 2.
Iti sabali a bangir, inwayat ti gobierno probinsial, babaen ti Provincial Social Welfare and Development Office (PSWDO) ken ti Provincial Disaster Risk Reduction Management Office (PDRRMO), ti panangipaay iti tulong kadagiti naapektaran nga ili. (Freddie Lazaro/Manila Bulletin//Lito Hilidon/Bannawag)
