Impakaammo ti Philippine National Police (PNP) nga idarumda ti asino man a maduktalan a mangilemlemmeng ken ni dati a presidential spokesperson Harry Roque bayat ti maar-aramid nga operasion iti pannakakemmegna, mayayon iti bilin ti Kamara.
Kinuna ni panakangiwat ti PNP Col. Jean Fajardo a kasla lalaisen ni Roque dagiti polis gapu iti panangy-upload-na iti video-na para iti programana iti internet -- nga inladladawna nga iny-upload ti video tapno saan isuna a matunton dagiti autoridad.
Kinuna ni Fajardo nga agtultuloy latta ti operasion ti PNP a panangsapulda ken ni Roque tapno maidatag daytoy iti Quad-Committee ti Kamara a nangipaulog iti warrant of arrest.
Iti imbestigasion ti Quad-Committee iti drug war ken ti ilegal a Philippine Offshore Gaming Operators (POGOs) iti pagilian, rimmuar nga adda pakainaigan ni Roque iti ilegal a POGO kalpasan a matiliw ti maysa a POGO operator iti mismo nga uneg ti maysa a maatap a balay ni Roque.
Mangnamnama ni Marcos iti pannakaisubli ti panangipateg ni Pinoy iti arte a Filipino
Gapu itoy, binallaagan ni Fajardo dagiti mangilemlemmeng ken ni Roque ta mabalin ida nga idarum ti PNP gapu iti panangkanunongda iti tao a sapsapulen ti autoridad. (Aaron Recuenco/Manila Bulletin//Lito Hilidon/Bannawag)
