Rimmuar dagiti empleado ken kliente ti Pasig City Hall of Justice iti lugar kalpasan a makaawatda iti pangta ti bomba itay agsapa ti Martes, Oktubre 1.
Naisardeng pay laeng ti maar-aramid a bista iti uneg ti pasdek bayat ti panangimbestigar dagiti kameng ti bomb squad iti pasamak.
Kas kuna dagiti autoridad, adda naawat dagiti opisial ti pasdek a maatap a bomb threat babaen ti e-mail itay 8:45 ti agsapa.
Segun iti e-mail, bumtak ti pasdek iti 9:00 ti agsapa ket masapul a rummuarda a dagus iti pasdek.
Ruth Padilla, agngayangay a kas Diputado ti Nueva Vizcaya
Nagpaut iti 15 agingga 20 a minuto ti panangtingiting dagiti kameng ti bomb squad agingga nga indeklarar ti Explosive Ordnance Disposal (EOD) K9 nga awanen ti pangta ken natalgeden ti pasdek, isu a pinalubosandan a sumrek dagiti tao.
Makium-umanen ti autoridad iti anti-cybercrime unit tapno sapulenda ti naggapuan ti e-mail.
Pinalagipan dagiti opisial ti publiko a saanda a pagrabak dagiti pangta ti bomba ta adda linteg a maibusor iti daytoy. (Richielyn Canlas/Manila Bulletin//Lito Hilidon/Bannawag)
