Kuna ti Iran a nalpasen ti panagtignay dagiti soldadona maibusor iti Israel, ngem nagballaag daytoy a napipigsa ken nabilbileg ti isungbatda no panggepen ti Israel ti agibales, segun ken ni Foreign Minister ti Iran Seyyed Abbas Araghchi.
Daytoy ti imballaag ni Araghchi iti paskilna iti X (dati a Twitter) ita, Oktubre 2, bayat ti panangilawlawagna iti inwayatda a panangraut babaen ti missile kadagiti puntiriada iti uneg ti Israel.
Kinuna ni Araghchi a "self-defense" laeng ti inaramidda, kas mayannatup iti Article 51 ti United Nations Charter, ta dagiti laeng militar ken security sites a responsable iti panangikisap iti Gaza ken Lebanon ti pinuntiriada.
Kinuna pay ni Araghchi a nagtepteppelda iti dandani dua a bulan, tapno laeng maiwayat ti ceasefire iti Gaza.
Mangnamnama ni Marcos iti pannakaisubli ti panangipateg ni Pinoy iti arte a Filipino
Kinuna ni Defense Minister ti Iran Aziz Nasirzadeh a no agibales ti Israel, nakarkaro ti sumaruno nga aramidenda, ket usarenda dagiti kabaruanan a missile a lebbenda. (XINHUA & ASSOCIATED PRESS/Manila Bulletin//Lito Hilidon/Bannawag)
