Pinirmaan ni Presidente Ferdinand “Bongbong” Marcos Jr. ti Republic Act (RA) No. 12023 wenno Value Added Tax (VAT) on Digital Services Law a mangipataw iti 12 porsiento a VAT kadagiti digital service providers (DSPs) tapno pumatas kadagiti local provider ken tapno manayonan ti mapastrek ti gobierno a mausar a pangbangon iti ad-adu pay a siled-pagadalan, health center, ken farm-to-market road iti sumaruno a lima a tawen.
Iti bitlana iti seremonia ti panagpirma iti Malakanyang idi Mierkoles, Oktubre 2, kinuna ti Presidente a rangtayan daytoy nga addang ti dakkel a giwang a pinarnuay ti napartak a panagbaliw ti digital landscape iti sistema ti panagbuis ti pagilian.
Sakupen ti linteg ti nadumaduma a serbisio kas iti online search engines, online marketplaces, cloud services, online media and advertising, online platforms, ken digital goods.
“Mairaman ditoy ti digital media, digital music, digital video on demand, ken digital advertising," kinuna ti Presidente.
Ruth Padilla, agngayangay a kas Diputado ti Nueva Vizcaya
Impanamnama ketdi ti Presidente iti publiko a nagdalan daytoy a linteg iti naannad a panagplano ken panagadal tapno maisigurado a daytoy a buis, saanna a dadaelen ti inobasion wenno lapdan ti panagdur-as.
Impaganetget ni Marcos a saan a sakupen ti VAT dagiti digital services a mainaig iti edukasion. Innayonna a mayalokar iti creative industries ti lima a porsiento ti mapastrek babaen ti RA 12023. (Argyll Cyrus Geducos/Manila Bulletin//Juan A. Asuncion/Bannawag)
