Rinugianen ti Commission on Human Rights (CHR) a sukimaten dagiti maatap a panangbutbuteng dagiti kameng ti Philippine National Police ken panangriribuk ti polisia kadagiti kameng ti media bayat ti panangipadamagda iti mapaspasamak iti panangarestar ti PNP ken ni daulo ti Kingdom of Jesus Christ (KOJC) Apollo Quiboloy.
Kinuna ti CHR ita, Oktubre 2, nga inwayatdan ti bukodda nga imbestigasion tapno maammuan ti agpayso a napasamak.
Nangrugi ti operasion ti polisia a panangarestar ken ni Quiboloy idi Agosto 24 ken nagleppas idi Septiembre 8 kalpasan a simmuko gapu iti kasona a non-bailable qualified human trafficking ken child abuse.
Segun iti Davao City Chapter ti National Union of Journalists of the Philippines (NUJP), adda nangbutbuteng ken nangriribuk kadagiti kameng ti media.
Mangnamnama ni Marcos iti pannakaisubli ti panangipateg ni Pinoy iti arte a Filipino
Impalagip ti CHR nga adda akem ti "media, kas Fourth Estate" iti panangsigurado nga adda mangbalanse iti bileg dagiti adda iti turay.
Indagadag met ti CHR kadagiti kameng ti media nga ipakaammoda ti ania man a masagrapda a pamutbuteng, panangriribuk, wenno pangta babaen ti Alisto! Alert Mechanism. (Jeffrey Damicog/Manila Bulletin//Lito Hilidon/Bannawag)
