Gutgutugoten ni Diputado ti Surigao del Norte 2nd district Robert Ace Barbers ti Department of Justice (DOJ) nga idarumdan da Police Colonel Royina Garma ken Edilberto Leonardo iti kaso a pammapatay (murder) gapu iti pannakasaneb ken pannakapapatay ni board secretary ti Philippine Charity Sweepstakes Office (PCSO) Wesley Barayuga idi 2020.
Kinuna ni Barbers a pannakadaulo ti Quad-Committee (quad-comm) ti Kamara ita, Oktubre 2, a saanen nga urayen ti DOJ ti konklusion ti komite a mangim-imbestigar iti pannakapapatay ni Barayuga, ngem mabalin met nga imtuodenda dagiti dua a saksi a da police Lt. Col. Santie Mendoza ti Philippine National Police-Drug Enforcement Group (PNP-DEG) ken Nelson Mariano, a drug informant ni Mendoza.
Kinuna pay ni Barbers a kitaenda ti testimonia dagiti saksi, ket ipiladan ti kaso a murder iti kabiitan a panawen.
Insingasing ni Diputado ti Surigao del Sur 2nd district Johnny Pimentel nga iramanda iti rekomendasion ti komite ti pannakaipila ti kaso maibusor kadagiti nadakamat a tao. (Ellson Quismorio/Manila Bulletin//Lito Hilidon/Bannawag)
