Anamongan ni Senate President Francis “Chiz” Escudero ti pannakaipaulog ti linteg a manggibus iti political dynasty, no la ket maresolbar dagiti sumagmamano a parikut.
Kinuna daytoy ni Escudero itay Oktubre 2, nupay naggapu isuna iti maysa a dinastia, ta pamiliada ti politiko iti Sorsogon. Ngem anamongan ni Escudero ti anti-political dynasty ta maisupiat daytoy iti interesna.
Inlawlawag ni Escudero a maibilang a "conflict of interest" no biangenna ti pannakaisurat daytoy, ngem ipaayna ti botosna no isu ti kasapulan tapno maanamongan daytoy.
Kinuna ni Escudero nga ipalubos ti Konstitusion ken paglintegan ti pagilian ti yaanamong iti maysa a gakat, uray di maitunos iti interes ti maysa a tao.
Mangnamnama ni Marcos iti pannakaisubli ti panangipateg ni Pinoy iti arte a Filipino
Segun iti 1987 Konstitusion, maiparit ti political dynasty "kas ilawlawag ti linteg." No awan ti linteg a mamagtignay iti daytoy, saan latta a maiparit ti kaadda ti political dynasty.
Kinuna ni Escudero nga addan gandat kadagiti napalpalabas a manggibus iti political dynasty ngem mapaayda a mangtaming no ania ti makunkuna a "political dynasty." (Dexter Barro II/Manila Bulletin//Lito Hilidon/Bannawag)
