Binilin ni Presidente Ferdinand Marcos Jr. (PBBM) dagiti ahensia ti gobierno nga ipaayda amin a tulong kadagiti Overseas Filipino Worker (OFW) iti Lebanon.
Segun ken ni Undersecretary ti Department of Migrant Workers (DMW) Bernard Olalia itay Oktubre 2, binilin ida ni PBBM nga ipaayda amin a kita ti tulong kadagiti mapagawid nga OFW manipud iti Lebanon.
Kinuna ni Olalia a manamnama a makaawat iti PhP150,000 a tulong pinansial tunggal OFW manipud iti DMW ken Overseas Workers Welfare Administration (OWWA). Tumulong met ti dadduma pay nga ahensia kas iti DFA (Department of Foreign Affairs), DOH (Department of Health), ken ti TESDA (Technical Education System and Skills Development Authority).
Iti sabali a bangir, imbilin pay ni PBBM a siguraduenda ti kinatalged dagiti OFW iti Lebanon iti tengnga ti kumarkaro a risiris.
Mangnamnama ni Marcos iti pannakaisubli ti panangipateg ni Pinoy iti arte a Filipino
Impakaammo ni Olalia a marigatanda a pagawiden dagiti OFW iti Lebanon ta awanen ti mapalubosan a tumayab nga eroplano, isu a saan a natuloy ti panagawid dagiti 15 nga OFW idi Sept. 25.
Kinuna ni Sekretario ti DMW Hans Leo Cacdac a balabalaenda ti Migrant Workers Office (MWO) iti Beirut ti pannakayawid ti 63 nga OFW nga agnanaed iti Dahieh.(Aaron Recuenco & Betheena Unite/Manila Bulletin//Lito Hilidon/Bannawag)
