Impaulog ni Presidente Vladimir Putin ti Russia itay nabiit ti maysa a linteg a mangiliklik iti pannakausig dagiti akusado kadagiti kaso kriminal no la ketdi sumrekda a soldado.
Naipaulog daytoy a linteg, a rimmuar iti maysa a website ti gobierno, iti panawen a kasapulan unay ti Russia ti nayon ti puersa militarna kalpasan ti agdua ket gudua a tawenen a pannakigubatna iti pagilian a Ukraine.
Amendaran daytoy a linteg ti maysa a seksion ti Russian criminal code nga agkuna a dagiti napaneknekanen a nagbasol ket mabalin a mawayawayaanda no la ketdi agpailistada a kameng ti military, ken dagiti suspek a maim-imbestigar pay laeng ti kasoda ngem di pay dimmanon iti korte ti kasoda ket kualipikadoda iti di pannakaituloy ti kasoda.
Daytoy baro a linteg, ikalawana ti pannakasuspende wenno pannakaibabawi iti kaso uray pay dagiti maus-usigen ti kasoda no la ketdi agpailistada a kameng ti military.
Mangnamnama ni Marcos iti pannakaisubli ti panangipateg ni Pinoy iti arte a Filipino
Daytoy nasuroken a dua a tawen a gubat iti nagbaetan ti Russia ken Ukraine ti mangkerkerras iti rekursos ti Russia. Itay laeng napan a bulan, kinuna ni Putin a nasken a manayonan ti bilang dagiti soldadoda iti 180,000.
Iti met singasing a sibubukel a badiet ti pagilian, nailatang ti 32.5% a para iti magastos ti puersa militar. (Associated Press/Manila Bulletin// Cles B. Rambaud/Bannawag)
