Adda iti Filipinas ni Presidente ti South Korean Yoon Suk Yeol manipud Oktubre 6 agingga 7 para iti state visit a mangpatibker pay iti relasionda iti Filipinas.
Impakaammo daytoy ti Embahada ti Korea iti Filipinas ita, Oktubre 3, ket kinunana a daytoy ti damo nga isasarungkar ni Yoon iti Filipinas kas Presidente ti Korea, ken ti umuna a Presidente ti Korea a simmarungkar iti las-ud ti 13 a tawen.
Makipaset ni Yoon iti panagsasarita a mangpatibker iti panagtinnulong ti dua a pagilian iti nadumaduma a benneg kas iti politika, seguridad, ekonomia, panagdur-as, kultura, ken panagiinnammo dagiti tao.
Kaasmang ti Filipinas ti South Korea iti panangirupir ti Filipinas iti kalinteganna iti West Philippine Sea ken iti panagtalinaed iti maibasar-linteg a kinaurnos iti Indo-Pasipiko. (Joseph Pedrajas/Manila Bulletin//Lito Hilidon/Bannawag)
