Tapno maiparang ti nabaknang a tawid a kultura ken tradision dagiti Indigenous People (IP) iti Ilocos Sur, maangay ti Begnas Di Ilocos Sur inton Oktubre 9 agingga iti 11, 2024 babaen ti panangisayangkat ti gobierno probinsial ti Ilocos Sur nga idauluan ni Gobernador Jeremias “Jerry” Singson ken iti panangiwanwan ti opisina ni SPM Elpidio Quines Sr., Indigenous People’s Mandatory Representative (IPMR) ti Sangguniang Panlalawigan ti probinsia.
Addaan iti tema a “Layad as Panag-es-esa, Idukpus na Nan Kultura ay Nagin-awa” wenno "Ayat iti Panagmaymaysa, Itundana ti Kultura a Nagin-awa," maangay ti begnas (thanksgiving wenno parambak ti panagyaman, panagidaton) iti Brgy. Cabaroan iti ili ti San Emilio
“Umaykayo makipagpaset, maysa daytoy a gundaway tapno makidanggaytayo dagiti IP iti probinsia, maammuantayo ti wagas ti panagbiagda ken tapno selebrarantayo dagiti naidumduma a kostumbre ken ritual dagiti kakabsattayo a kameng ti minoridad,” panangyawis ni Gob. Singson.
Maangay ti panglukat a ritual iti parbangon ti Oktubre 9 a pakaangayan ti panagdaydayaw ken ni Apo Kabunian ken pangdawatan metten iti panagballigi ti sibubukel a selebrasion ken ti nabuslon nga apit. Maisaruno ti pannakailukat ti Apit ken Partuat di Tribu Trade Fair a pakailakuan dagiti nadumaduma a produkto a partuat dagiti IP. Maangay pay ti maysa a cookfest a pakaisalipan dagiti exotic a potahe dagiti tribu. Iti malem, maangay ti cultural presentation a pakaipabuyaan dagiti agduduma a sala, tokar, ken dayyeng. Iti karabiyanna, iti “Anap di Gatan ken Bangan di Begnas 2024”, agsasalipan dagiti agkakapintas a babbalasang ken agkakataer a babbaro a kameng ti tribu manipud kadagiti ili nga addaan iti IP communities.
Ilocos Sur, Umuna a Puesto iti Regional SubayBAYANI Awards
Iti maikadua nga aldaw, Okt. 10, maangay ti IPlympics a pakaangayan ti salip ti nadumaduma nga ay-ayam dagiti tribu, kasta metten ti “Pammadayew Sintatako” a pakapadayawan dagiti nasisiglat ken maipannakkel a kameng ti IP.
Maangay iti maudi nga aldaw, Okt. 11, ti Indigenous People Regional Summit a paset ti selebrasion ti National Indigenous People Month.
Duapulo ket dua nga ili ti Ilocos Sur ti addaan iti IP communities a pagnaedan dagiti tribu ti Bago, Kankanaey, ken Itneg (Tingguian). (Mancielito S. Tacadena/PG-Ilocos Sur)
