Impakaammo ni Chairman ti Commission on Elections (Comelec) George Erwin Garcia ita, Oktubre 4, a nagsanud ti maysa a lokal a kaasmang ti Miru Systems (Miru) iti Automated Election System (AES) para iti 2025 National ken Local Election.
Segun ken ni Garcia, nagikkat ti kompania a St. Timothy Construction Corporation (STCC) iti pannakiasmangna iti Miru, Integrated Computer Systems, Inc. (ICS), ken Center Point Solutions and Technologies, Inc. (CPSTI) gapu iti posible a panagngayangay ti maysa kadagiti agtagikua iti kompania iti eleksion 2025.
Kinuna ni Mayor ti Pasig City Vico Sotto a ni Sarah Discaya, a maysa kadagiti agtagikua iti STCC ken St. Gerrard Construction, ket agngayangay a para mayor ti Pasig City.
Inlawlawag ti Miru a saan a paset ti STCC iti pannakabukel ti automated counting machines (ACMs) ken dadduma pay a mausar iti 2025 National and Local Elections, ket saan daytoy nga apektaran ti pannakaipaay ti napimpintas nga automated system kadagiti Filipino.
Blazers, inatiwda ti Red Lions; kasangoda ti Cardinals iti NCAA finals
Segun ken ni Garcia, inyumandan daytoy a parikut iti law department ti Comelec, ket kinunana a saan nga ipalubos ti Comelec a mapagduaduaan ti eleksion gapu laeng iti panagngayangay ti maysa kadagiti agtagikua iti kaasmang a kompania.
Kinuna ni Garcia a dua laeng ti pagpilian mainaig iti daytoy: umuna, masapul nga agikkat ti STCC iti joint venture; wenno maikadua, madiskualipikar ti nadakamat a kandidato, ta nalawag nga adda conflict of interest daytoy. (Dhel Nazario/Manila Bulletin//Lito Hilidon/Bannawag)
