Impakaammo ni Presidente Ferdinand Marcos Jr. ita, Oktubre 4, a mangiruarda iti PhP25 a milion a pondo tapno masaranay dagiti umili nga inapektaran ni Bagyo Julian iti Batanes.

Simmarungkar ni Presidente Marcos Jr.iti Basco, Batanes kalpasan a begbegen manen daytoy ni Bagyo Julian a nagsubli iti Philippine Area of Responsibility (PAR).

Kinuna ni Marcos a mangted met ni House Speaker Martin Romualdez iti PhP15 a milion para kadagiti naapektaran a residente.

Mangiruar met ti Department of Social Welfare and Development (DSWD) iti PhP10,000 a tulong pinanasial iti tunggal pamilia a naapektaran ti bagyo.

PBBM, dumar-ay iti ASEAN Summit iti Laos

Malaksid iti daytoy, adda naipaay ti DSWD a tulong nga agbalor iti PHP2.78 a milion kadagiti naapektaran a pamilia, ken nangted met ti Office of the Civil Defense (OCD) iti 10 a kilo a bagas iti tunggal 4,000 a benepisiario.

Impanamnama ti Presidente a tulongan ida ti lokal a gobierno a mangipatakder manen kadagiti nadadael a balayda.

Mapan a 7,088 a pamilia wenno 21,348 a katao ti naapektaran iti Bagyo Jullian iti Batanes, ken adda pay laeng iti pagbakuitan ti 23 a pamilia wenno 87 a katao. (Betheena Unite/Manila Bulletin//Lito Hilidon/Bannawag)