Kadua ni Presidente Ferdinand R. Marcos Jr. dagiti padana a daulo nga Asiano a dumar-ay iti 44th ken 45th Association of Southeast Asian Nations (ASEAN) Summit and Related Summits a maangay iti Vientiane, Laos manipud Oktubre 9 agingga 11.
Kinuna ni Assistant Secretary of the Office of ASEAN Affairs ti Department of Foreign Affairs (DFA) Daniel Espiritu a manamnama nga ilungalong ni PBBM dagiti interes ti Filipinas, kas iti panangirupirna iti kalintegan ti Filipinas kadagiti masakupanna a kas maitunos iti international law.
Iti ASEAN Summit, mabalin a makapatang ni PBBM dagiti daulo ti Canada, New Zealand, Vietnam, ken Japan.
Sumagmamano kadagiti mapagsasaritaan ti maipapan iti parikut ti Myanmar, Ukraine, ti Korean Peninsula, Gaza, ken dadduma pay a parikut iti Indo-Pacific Region.
DFA, kinanselarna ti pasaporte ni Alice Guo
Inton Oktubre 10, dumar-ay ni PBBM iti sumagmamano nga ASEAN+1 summit kas iti 27th ASEAN-China Summit, ti ASEAN-Republic of Korea Summit, ti ASEAN-Japan Summit, ken ti ASEAN+3 Summit. Maangay met ti ASEAN-Australia Summit, ti ASEAN-India Summit, ken ti ASEAN-Canada Special Summit iti isu met laeng nga aldaw.
Inton Oktubre 11, tumabuno met ni PBBM iti ASEAN-US Summit ken ti East Asia Summit a dar-ayan ti 10 a pagilian ti ASEAN. Iti isu met laeng nga aldaw, maangay ti ASEAN-UN Summit ken ti pannakayallatiw ti panangidaulo iti ASEAN manipud iti Laos a mapan iti Malaysia.
Iti sabali a bangir, ni Secretary of State ti US Antony Blinken ti mangibagi ken ni US President Joseph Biden iti taripnong idinto a ni Premier Li Qiang ti mangibagi ken ni Chinese President Xi Jinping. (Argyll Cyrus Geducos/Manila Bulletin//Lito Hilidon/Bannawag)
