Pormal a nainauguraran ti Narvacan Tobacco Farmers Tourism and Commercial Complex iti Narvacan, Ilocos Sur idi Septiembre 28, 2024 babaen ti panangidaulo ni Mayor Pablito V. Sanidad, dagiti opisial ti gobierno probinsial a pakairamanan ni Bokal Gina Cordero, ken dagiti dadduma pay nga opisial ti gobierno lokal ti Narvacan.
Naidumduma ti pannakadesinio ti parke ta masarakan ti 1574 Salcedo shipwreck (replika ti narneb a barko ni Kapitan Juan de Salcedo iti baybay ti Narvacan idi tawen 1574) a nakaadawan ti nagan ti ili a Narvacan manipud iti balikas a “nalbakan.”
Ditoy a naibalay ti Narvacan Tourism Hub ken ti Rustic Box Steakhouse. Makita pay ti estatua ni Demalina, ti daulo iti tribu a naam-ammo dagiti Kastila iti Narvacan iti isasangladda. Ni Demalina ti umuna a Narvacanean a nairekord ti naganna.
Iti maysa a paset ti parke, masarakan met ti Narvacan Legislator’s Memorial a pakakitaan iti estatua ken busto dagiti mabigbig a Narvacanean a nagkameng iti Kongreso iti Filipinas a pakairamanan da Senador Prospero C. Sanidad, Diputado Fidel Villanueva, Diputado Pablo c. Sanidad, ken Diputado Lucas V. Cauton.
Ilocos Sur, Umuna a Puesto iti Regional SubayBAYANI Awards
Masarakan pay iti parke ti Children’s Park & Dog Park ken ti Empanadaan.
Ininaw da Mayor Luis “Chavit” Singson ken Mayor Pablito V. Sanidad ti panagbalin ti ag-10 nga ektaria a dati a lote ti Northern Textile Mills a kas baro a government center ti Narvacan a pakaar-aramidan itan ti baro a munisipio ti ili, baro a kuerpo ti polisia, baro a tiendaan, ken dadduma pay a pasdek.
Kinuna ni Mayor Sanidad a ti parke ti agbalin a batonlagip kadagiti mannalon iti Narvacan nangruna dagiti agmulmula iti tabako gapu ta ti Tobacco Excise Tax wenno buis ti tabako a maibingbinglay iti Narvacan ti nakatulong iti dakkel iti panaglupos ti lokalidad. (Eliseo B. Contillo)
