Limapulo ket tallo a barangay iti walo nga ili iti La Union ti nakategoria a kas red zone gapu iti panagraira ti African swine fever (ASF), segun iti Department of Agriculture (DA).
Masarakan dagitoy a barangay iti Balaoan, Luna, Bangar, Bacnotan, Santol, San Juan, Rosario, ken iti Siudad ti San Fernando.
Kinuna ni Dr. Alfredo Banaag, DA 1 (Ilocos Region) Regulatory Division Chief ken ASF Focal Person, iti maysa nga interbiu iti telepono kenkuana idi Biernes, Okt. 4., a mapan a 2,460 a baboy ti napapatay (culled) sipud pay idi Okt. 3 tapno maatipa ti ikakaro ti panagwaras ti virus. Aganay met 343 nga agtartaraken iti baboy ti apektado.
Segun ken ni Banaag, naka-quarantine para iti ASF dagiti nasao nga ili ket saan a mapalubosan a maibiahe dagiti sibibiag a baboy iti ruar dagiti ili. Innayon ni Banaag a dagiti mabalinen nga ilako a baboy a na-testing nga agnegatibo iti virus, madagdagus dagitoy a maipan iti slaughterhouse.
Ilocos Sur, Umuna a Puesto iti Regional SubayBAYANI Awards
Inlawlawag met ni Banaag a nabalbaliwan ti wagas ti DA iti pannakataming ti ASF. No idi ket masapul a ma-cull amin a baboy iti uneg ti 1 a kilometro a radius ti lugar a yan ti naimpektaran a baboy, nasuktanen sipud pay idi Septiembre iti 500 a metro ti radius.
Dagiti baboy nga agpositibo iti virus, ma-cull a dagus idinto a dagiti agnegatibo maparti iti slaughterhouse sa mailako kadagiti kostumer.
Kinuna met ni Banaag a dagiti apektado nga agtartaraken iti baboy, makaawatda iti indemnification manipud iti DA para kadagiti ma-cull a baboyda: sag-PhP4,000 tunggal baboy para kadagiti burias, PhP8,000 kadagiti growers ken fatteners, ken PhP12,000 para iti breeders.
“Makaalada iti indemnification para iti maximum ti 20 a baboy tunggal agtartaraken,” innayonna. (Hilda Austria/Philippine News Agency)
