Nagsasaruno ti panagraut ti Israel manipud iti tangatang iti abagatan a paset ti Beirut ken ti dalan a nagbedngan ti Lebanon ken Syria, a kangrunaan a pagpagnaan ti rinibu a tattao nga agbakbakuit gapu iti panagbomba ti Israel.
Awan pay pakaammo ti Israel no ania ti puntiriada, ken awan pay ti impormasion mainaig kadagiti nadangran. Ngem kinuna ti National News Agency ti Lebanon nga addan nasurok a 10 a nagsasaruno a panagraut ti Israel iti lugar.
Naiwayat ti airstrike kalpasan ti pakaammo ti Israel nga ikagkagumaanan ti Hezbollah ti Lebanon nga ipan dagiti ramit a pakigubat iti pagserkan ti pagbedngan.
Mapapati nga umaw-awat ti Hezbollah iti armasna manipud iti Iran iti babaen ti Syria. Adu a kameng ti Hezbollah ti adda iti agsumbangir a paset ti beddeng, maysa a rehion a pakigugubatanda a kaduada dagiti puersa ni Presidente ti Syria Bashar Assad.
Kasasaad iti Indo-Pacific a rehion, pakaseknan ti sangalubongan
Iti sabali a bangir, dimteng iti Beirut ni Foreign Minister ti Iran Abbas Araghchi itay Oktubre 4, ket manamnama a pagsasaritaanda ti gubat iti nagbaetan ti Israel ken Hezbollah. (ASSOCIATED PRESS/Manila Bulletin//Lito Hilidon/Bannawag)
