Kalpasan ti napigsa nga angin ken tudo nga inyeg ni Bagyo Krathon iti Taiwan, nagtuloy manen dagiti obra, klase iti eskuela, ken dagiti biahe iti ikakapsut ken ipapanawen ti bagyo.
Maysa kadagiti kapipigsaanen a bagyo ni Krathon a nagduprak iti Taiwan.
Mapan a tallo nga aldaw nga inasak-asak ti bagyo ti Taiwan sipud isasanglad daytoy iti isla manipud iti baybay iti nagbaetan ti Taiwan ken Filipinas kalpasan a limmabas daytoy iti Batanes Islands ken dumaya a murdong ti Luzon kas supertyphoon Julian.
Kimmapuy ni Krathon ket nagbalin laengen a tropical depression idi Biernes ket nagturong a nagsubli ti sentro ti angin daytoy iti baybay.
Resolusion ti UN nga agkidkiddaw ti ceasefire iti Gaza, saan a pinaboran ti Estados Unidos
Naglukat manen dagiti pagadalan ken negosio malaksid iti Siudad ti Kaohsiung, Pingtung County, ken iti sumagmamano a paset ti Hualien County ken New Taipei. Naisubli met dagiti domestic flight a dua nga aldaw a naka-ground.
Sinagsag ni Krathon ti Kaohsiung iti angin daytoy nga immabot iti 126 kph (78 mph). Nabnabual dagiti kayo, naregkas ti at-atep ti dadduma a pasdek, ken linayusna dagiti kalsada.
Napipigsa a tudo ken layus met ti sinagrap dagiti abagatan ken daya a coast ti Taiwan. Mapan a 171 a sentimetro a tudo ti imbuyatna iti kabambantayan ti Taitung County iti las-ud ti innem nga aldaw.
Dua a tattao ti natay idi rugrugi ti lawas ken maysa a tao ti mapukpukaw pay laeng, segun iti Taiwan Fire Department. (Simina Mistreanu/Associated Press)
