Mairaman ni La Paz Mayor Joseph Bernos ti Lakas-Christian and Muslim Democrats ti nangipila iti sertipiko ti kandidaturana idi kalman, Domingo, Oktubre 6, para iti kinadiputado iti kakaisuna a Distrito ti Abra.
Nairaman pay kadagiti nangipila iti kandidaturada da Eustaquio Bersamin, kabsat ni Executive Secretary Lucas Bersamin, para gobernador, ken ti kaanakanna a ni Anne Bersamin, para bise gobernador.
Nagpaayen ni La Paz Mayor Joseph Bernos a diputado iti dua a termino, manipud idi 2016 agingga idi 2019, ken idi 2019 agingga idi 2022 sakbay a nagtaray a mayor idi 2022.
Agkandidato met niRep. Mechie Bernos, asawa ni Mayor Bernos, a diputado ti party-list group a Solid North (Solidarity of Northern Luzon People).
Mangnamnama ni Marcos iti pannakaisubli ti panangipateg ni Pinoy iti arte a Filipino
Maysa a kameng ti Ortega political family iti La Union ken ni Apayao Gov. Elias Bulut Jr. ti maikadua ken maikatlo a nominee ti party-list, kas panagsaganadda.
Iti Ilocos Sur, agkandidato iti isu met laeng a puestona ni Dip. Kristine Singson-Meehan.
Agpapaay ni Meehan a kas House deputy speaker, ken agpaidasig para iti maikatlo ken maudi a terminona a kas mangibagi iti Kamara iti maikadua a Distrito ti Ilocos Sur.
Iti La Union, impila metten ni Vice Gov. Mario Ortega ti kandidaturana a para gobernador. Sanguenna ti apokona, ni Gov. Raphaelle Veronica “Rafy” Ortega-David.
Kadua ni Ortega a nangipila iti kandidaturana ni Aringay Mayor Eric Sibuma a para bise gobernador; ken da reeleksionista Rep. Paolo Ortega ti 1st district ken Rep. Dante Garcia ti 2nd district a mangsango ken ni dati a Gov. Francisco Roberto “Pacoy” Ortega VI. (Freddie Lazaro/Manila Bulletin// Cles B. Rambaud/Bannawag)
