Opisial a binukel ti Filipinas ken ti Republic of Korea (South Korea) ti 75-tawen a diplomatiko a relasionda iti nair-irut a linnangenda iti tay-ak ti negosio.
Nabukel daytoy iti panagpatang da Presidente Ferdinand Marcos Jr. ken Presidente ti South Korea Yoon Suk-yeol bayat ti dua-aldaw nga State Visit iti Filipinas ita, Oktubre 7.
Inladawan ni Presidente Marcos Jr. ti relasion ti Filipinas ken South Korea a kas "naisalaysay" a dimmakkel manipud pannakaipasdek ti South Korea idi 1949, kangrunaanna kalpasan a nakigubat dagiti soldado a Filipino a kaduada dagiti Koreanotidi panawen ti Korean War iti sumuno a tawen.
Iti biang ni Presidente ti South Korea Yoon, namnamaenna a mapasaknap pay ti relasion ti pagilianda, kangrunaan iti tay-ak ti negosio ken panagtinnulong iti ekonomia, kasta met ti panagasmangda iti seguridad, digital technology, ken enerhia.
Mangnamnama ni Marcos iti pannakaisubli ti panangipateg ni Pinoy iti arte a Filipino
Kinuna Ni Yoon a ti Filipinas ti umuna a pagilian iti Southeast Asia a nangipasdek iti diplomatiko a relasion iti South Korea, ket binigbigna a ti Filipinas ti kaaduan ti impatulodna a soldado iti Korea idi panawen ti Korean War.
Nabuangay ti bilateral relation ti Filipinas ken South Korea idi Marso 3, 1949 ken ti Filipinas ti maikalima a pagilian a nangbigbig iti South Korea.
Patien met ni Presidente Marcos a panawenen tapno iragpat iti sumaruno nga agpang ti panagkadua ti Filipinas ken South Korea. (Argyll Cyrus Geducos & Joseph Pedrajas/Manila Bulletin//Lito Hilidon/Bannawag)
