Inkari ni Senate Minority Leader Aquilino “Koko” Pimentel III ti pannakareporma ti party-list system ti pagilian, ta ar-aramaten daytoy dagiti pamilia ti politiko a pasaknapen ti bilegda.
Daytoy ti inkari ni Pimentel bayat ti panagipilana iti Certificate of Candidacy (CoC) kas mangibagi iti Umuna a Distrito ti Marikina City iti Kamara ita, Oktubre 7.
Segun ken ni Pimentel, napukawen ti anag ti party-list a nairanta a mangted koma kadagiti marigrigat ken dagiti mailupitlupit iti timekda iti Kamara -- ngem nadadael daytoy gapu iti political dynasty.
Kinuna pay ni Pimentel a dumakdakkel dagiti politikal a pamilia ket saanen nga umdas dagiti pagakman iti lugarda. Ngem maisaknapda ti bilegda babaen dagiti party-list.
Mangnamnama ni Marcos iti pannakaisubli ti panangipateg ni Pinoy iti arte a Filipino
Maibatay iti Artikulo VI ti Konstitusion, maaddaan ti Kamara iti party-list system dagiti rehistrado a nailian, rehional, ken sektoral a partido wenno organisasion.
Dinakamatna pay a ti party-list a grupo ket masapul nga aggapu iti sektor ti labor, peasant, urban poor, indigenous cultural communities, babbai, agtutubo, ken dadduma pay a sektor kas inkeddeng ti linteg, malaksid iti sekta ti relihion.
Segun ken ni Pimentel, napalusposan dagiti politikal a pamilia gapu iti sao a "rehional" a mangbigbig iti pannakabuangay dagiti rehional a party-list, nga iggem dagiti politikal a pamilia.
Ngem inlawlawag ni Pimentel a nasken a mareporma ti Konstitusion tapno mareporma ti party-list system ti pagilian. (Dexter Barro II/Manila Bulletin//Lito Hilidon/Bannawag)
