Agsublin iti pagilian ti 151 nga Overseas Filipino Workers (OFWs) manipud Lebanon iti umay a lawas, segun iti Department of Migrant Workers (DMW) itay Oktubre 7.
Kinuna ni Sekretario ti DMW Hans Leo Cacdac a malaksid iti 151 nga agawid, maiprosproseso met ti panagawid ti agarup 235 nga OFW iti opisina ti Lebanon, ket agtultuloy latta ti panagawat ti DMW kadagiti OFW a kayatdan ti agawid.
Segun ken ni Cacdac, immandar ni Presidente Marcos Jr. a tulongan ken siguraduen ti kinatalged dagiti OFW iti Israel, Lebanon, iti West Bank, ken Gaza, ket mayawid ida iti Filipinas a natalged.
Madasig iti dua a bunggoy dagiti agawid babaen ti commercial flight manipud Oktubre 11 agingga Oktubre 28.
Mangnamnama ni Marcos iti pannakaisubli ti panangipateg ni Pinoy iti arte a Filipino
Iti agdama, agarup 2,000 nga OFW iti Northern Israel ti naibakuit dagiti Israeli Defense Forces (IDF) ket addadan iti natalged a lugar.
Kinuna ni Cacdac a kaaduan kadagiti adda iti shelter ket agur-uray laeng iti pannakaisublida iti pagilian. Ngem adda dagiti Filipina a nakaasawa iti Lebanese a kadua dagiti pamiliada, agraman ubbing.
Kinuna ni Cacdac nga umad-adun ti bilang dagiti OFW a kayatdan ti agsubli iti pagilian, nangruna ta kumarkaro ti pannakabomba iti lugar nga adda iti Alert Level 3.
Agarup 430 nga OFW iti Lebanon ti napasubli ti DMW, Overseas Workers Welfare Administration (OWWA), ken Department of Foreign Affairs (DFA) sipud idi Oktubre idi napan a tawen. (Marita Moaje/PNA//Lito Hilidon/Bannawag)
