Isayangkat ti Filipinas ken lima pay a kakaduana a pagilian ti sangsangkamaysa a panaglayag iti taaw iti Amianan a Luzon a kas paset ti “Exercise SAMASAMA 2024” a mangpasayaat iti panagtinnulongda bayat ti dakkel a pannakaipakat ti puersa, segun iti Philippine Navy (PN) ita, Oktubre 8.

Indauluan ni Vice Commander ti PN, Rear Adm. Jose Ma. Ambrosio Ezpeleta ti panglukat a seremonia iti Naval Operating Base iti Subic, Zambales a dar-ayan dagiti mangibagi iti navy ken marine force ti Estados Unidos (US), Australia, Canada, France, ken Japan.

Ti SAMASAMA Exercise, a maysa a Philippine-US bilateral exercise, ket paset ti Cooperation Afloat Readiness and Training (CARAT) ti panagsanay ti adu a pagilian tapno mapasayaat ti kabaelan ti navy ti US, ken dagiti kaasmangna a pagilian, nga agtitinnulong nga agresponde iti gagangay ken di gagangay a pangta iti seguridad iti Indo-Pacific a rehion.

Nairaman iti panagsanay ti BRP Jose Rizal (FF 150)​, BRP Waray (LC-288)​, ken BRP Nestor Reinoso (PC 380)​ ti PN; ti Arleigh Burke-class guided-missile destroyer USS Howard (DDG 83) ken ti P-8A Poseidon ​maritime surveillance aircraft​ ti US Navy; ti Halifax-class frigate ​​HMCS Vancouver (FFH 331) ken ti CH-148 Cyclone helicopter​ ti Royal Canadian Navy​; ken ti Shin Maywa US-2 amphibious aircraft ken Kawasaki P-1 maritime patrol aircraft​ ti ​Japa​n Maritime Self-Defense Force​, kndp.

Nasional

Blazers, inatiwda ti Red Lions; kasangoda ti Cardinals iti NCAA finals

Kinuna ti PN a ti panagsanay ket saan a maibusor iti ania man a pagilian, nupay nagbalaw ti China gapu iti pannakikappon ti Filipinas iti sabali a pagilian a mangiwayat iti maritime exercise, ta rubroban daytoy ti riri iti West Philippine Sea (WPS).

Ti plano a joint sail iti SAMASAMA ket maangay iti sumagmamano a lawas kalpasan nga indauluan Armed Forces of the Philippines (AFP) dagiti kaasmangda iti Australia, Japan, New Zealand ken ti US iti sangsangkamaysa a panaglayagda iti WPS iti naangay a multilateral maritime cooperative activity (MMCA) idi Sept. 28. (Martin Sadongdong/Manila Bulletin//Lito Hilidon/Bannawag)